1) 家人真係見一次少一次。
以前一年見365日，依家可能一年見十幾廿日，少咗好多，大家都老得好快。
2) 原來每日要諗食咩/煮咩，係咁困難。
由於我廚藝有限，所以從自己識煮嘅幾樣野中揀一樣都好難。試過同麥仔去行街市，行完都唔知買咩，因為好多野都唔識煮。另外，一開始搬嘅時候好亢奮，覺得可以試盡當區美食，但不到兩星期我已經覺得呢個區嚟嚟去去都係咁，無咩好食。
3) 兩個人住都可以有好撚多衫洗。
明明一個人一日都係換一套衫啫，點解成日都要洗衫嘅？不過有時我見到啲污糟衫堆喺度又會好忍唔住想洗⋯結果成日都要洗衫晾衫⋯
4) 家務是做不完的。
以前覺得家務啫，洗衫晾衫吸塵拖下地啫，原來仲有好多野⋯抹野真係唔好忽略，抹下廁所、廚房、廳都夠玩死你。（esp同個潔癖人一齊住）
5) 坐低專心煲劇嘅時間原來好珍貴！
我以前用兩日就可以追到netlfix一季嘅劇集，每晚睇劇都睇到眼痛⋯（依家先知係咁奢侈）。依家做完野、食完飯、做好家務、沖埋涼都十一點㗎啦痴線！可以無間斷睇到一集劇都好感恩，因為通常睇睇下中間都會有野做⋯（黑寡婦我同麥仔分開咗三日睇呀痴根！）
6) 唔做家務嘅男人都應當絕種！
唔知係好彩定唔好彩，麥仔嘅潔癖令佢成為一位家務能手，所以有人同我分擔，一人做一半。有時我會想像如果要我一個人做晒會點，我應該會每日都發脾氣，好快離家出走。所以，男人，請幫手做家務！！！
7) 維持一個屋企正常運作已經不易。
所謂嘅正常運作，係指有齊日用品、有廁紙用、雪櫃唔係空、水煲有水、有乾淨衫著⋯原來要維持咁樣都唔容易㗎，一定要有個好腦袋，記得定時補給。（所以我開始要寫shopping list）
8 ) 自己用嘅野，唔好一味貪平。
近幾年我明白到有時唔可以一味貪個平字，尤其係用嚟自己身上/常用嘅東西，同埋電器！一味貪平，隨時好快就壞，到時要換仲麻煩！另外，有啲野真係唔好慳，尤其 Mattress。
9) 原來自己脫髮問題非常嚴重。
終於明白點解啲人話屋企唔好用咁淺色地板，原來女人一日可以甩咁多頭髮！吹完頭可以成個地下都係頭髮！沖完涼個去水位都可以全部都係頭髮！每日咁甩法我都未禿頭，都好佩服自己！（女仔吹完頭一定要吸走啲頭髮，唔係會飛到全屋都係，到時吸死自己）
10) 人生嘅bullshit事就如灰塵一樣，最緊要及時清理。
Bullshit事如灰塵一樣天天都多，有時會好懶，會隻眼開隻眼閉放任佢哋唔理，但原來你一日扮睇唔到、兩日唔理，三日唔得閒理⋯之後就會積聚太多，到時要一次過清理仲辛苦。不如及時清理，反正有啲事你今日唔做，他日都係一樣要由你自己去做。
各位有無補充？
IG：@hkgirlfriend
FB：港女友
Sharing interesting post @ Nosda
